रसुवा कोरोनाविरुद्धको पूर्ण खोपयुक्त जिल्ला

धुञ्चे । रसुवा कोरोनाविरुद्धको पूर्ण खोपयुक्त जिल्ला बनेको छ । जिल्लामा कोरोनाविरुद्धको खोप लगाउन योग्य १८ वर्षमाथिका सबै नागरिकले पूर्ण खोप पाएसँगै रसुवा कोरोनाविरुद्धको पूर्ण खोपयुक्त जिल्ला बनेको हो । जिल्लामा कोरोनाविरुद्धको पहिलो र दोस्रो गरी खोप लगाउन योग्य सबैलाई पूर्ण खोप लगाइएको स्वास्थ्य कार्यालय रसुवाका प्रमुख बशन्त चालिसेले जानकारी दिए ।

खोप लगाउन योग्य सबैले पूर्ण खोप पाएसँगै खोप अभियान सक्किएको उनको भनाई छ । जिल्ला स्वास्थ्य कार्यालयमा ६ सय डोज खोप रहेको छ । खोप लगाउन छुटेका कोही आए लगाइने चालिसेले बताए ।

स्वास्थ्य कार्यालय रसुवाको तथ्याङ्क अनुसार जिल्लामा ४४ हजार ९८१ जनसंख्या छ । जसमध्ये १८ वर्ष माथिका कोरोनाविरुद्धको खोप लगाउन योग्य २९ हजार १०६ जना रहेका छन् । तीमध्ये २९ हजार १०१ जनाले कोरोनाविरुद्धको पहिलो मात्रा खोप पाएका छन् । जुन ९९.९९ प्रतिशत हो ।

कोरोनाविरुद्धको पहिलो मात्राको कोभिसिल्ड खोप ३ हजार २८० जनाले पाएका छन् । २० हजार २१७ जनाले भेरोसेलको पहिलो मात्राको खोप पाएका छन् । ३ हजार ६०४ जनाले एष्टाजेनेकाको खोप पाएका छन् भने एक मात्रा मात्र लगाए हुने जोन्सन एण्ड जोन्सन दुई हजारले लगाएका छन् ।

कोरोनाविरुद्धको दोस्रो मात्राको खोप ९४.२८ प्रतिशतले पाएका छन् । कोरोनाविरुद्धको दोस्रो मात्राको कोभिसिल्ड खोप १ हजार ३० जनाले पाएका छन् । २० हजार १५६ जनाले भेरोसेलको दोस्रो मात्राको खोप पाएका छन् । एक मात्रा मात्र लगाए हुने जोन्सन एण्ड जोन्सन खोप २ हजारलाई लगाइएको जनाइएको छ । कूल ४ हजार २५६ जनाले एष्टाजेनेका खोप लगाएका छन् ।

९४.२८ प्रतिशत नागरिकले जिल्लामा कोरोनाविरुद्धको पूर्ण खोप लगाएको पाइएको छ । बाँकीले पहिलो खोप जिल्लामै लगाए पनि दोस्रो खोप बाहिरी जिल्लामा लगाएको पाइएको छ ।

२३ मंसिर २०७८, बिहीबार ११:१९



तपाईको प्रतिक्रिया