स्वास्थ्य संस्थामा प्रसुती हुनेको संख्यामा कमी आयो

विदुर । परिवार नियोजन सुरक्षित मातृत्व तथा नवजात शिशु सम्बन्धी पत्रकारसंगको अन्तरक्रिया कार्यक्रममा स्वास्थ्य कार्यालय नुवाकोटले सार्वजनिक गरेको तथ्याङ्क अनुसार आर्थिक वर्ष ०७७/७८ मा ४९ प्रतिशत, ०७८/७९ मा ४२ प्रतिशत र २०८० को अर्धबार्षिकमा २२ प्रतिशत मात्र रहेको तथ्याङ्कमा रहेको छ ।

त्यस अवसरमा सुरक्षित प्रसुती सेवालाई प्रभावकारी बनाउन सकिएमात्र मातृ मृत्युदर तथा बाल मृत्युदर कम गर्न सकिने धारण विदुरमा आयोजित एक कार्यक्रमका सहभागीहरूले बताएका छन् ।

राष्ट्रिय स्वास्थ्य शिक्षा सुचना तथा सञ्चार केन्द्र टेकु काठमाडौं, स्वास्थ्य कार्यालय नुवाकोट तथा बुद्ध हेल्थ प्रोमोसन एण्ड उजुकेशन सेन्टर राजविराजको आयोजनामा विदुरमा भएको कार्यक्रममा बोल्दै जिल्ला स्वास्थ्य कार्यालय नुवाकोटका प्रमुख महेन्द्रध्वज अधिकारीले ५५ वटा स्वास्थ्य केन्द्रमा बर्थिङ सेन्टर सञ्चालन गरी सुरक्षित सुत्केरी सेवा प्रदान गरिएको बताए । उनले जिल्लामा हरेक वर्ष ५ हजार शिशु जन्मने गरेको तथ्याङ्कसमेत सार्वजनिक गरे ।

सरकारले गर्भावस्थामा गर्न‘पर्ने स्वास्थ्य परीक्षण ४ पटकबाट बढाएर अहिले सरकारले ८ पटक पु-याएको छ । आठपटक गर्भजाँच गराएवापत ८ सय रुपैयाँ प्रोत्साहन भत्तासमेत सरकारले प्रदान गर्दै आइरहेको छ । सो अवसरमा दिगो विकास लक्ष्य अन्र्तगत सन् २०१५ देखि ०३० सम्म सरकारले स्वास्थ्य क्षेत्रमा गर्नुपर्ने सुधारको विषयमा पनि छलफल भएको थियो । सरकारले ३० मिनेट पैदल दूरीमा स्वास्थ्य संस्थाको व्यवस्था भएपनि अझै पनि स्वास्थ्य संस्थामा सुरक्षित सुत्केरी नगराउँदा शिशु तथा मातृ मृत्युदर कम गर्न नसकिएको स्वास्थ्य प्रमुख अधिकारीले बताए ।

कार्यक्रममा राष्ट्रिय स्वास्थ्य शिक्षा सुचना तथा सञ्चार केन्द्रकी कृतिका प्रसाई, नेपाल पत्रकार महासंघका उपाध्यक्ष नवदीप श्रेष्ठलगायतले नुवाकोटको स्वास्थ्य सेवा प्रभावकारी बनाई नवजात शिशु, मातृ मृत्युदर घटाई दिगो विकास लक्ष्य हाँसिल गर्नको लागि सरोकारवाला सबै लाग्नुपर्नेमा जोड दिए ।

सो अवसरमा नुवाकोटमा परिवार नियोजन, सुरक्षित मातृत्व तथा नवजात शिशु सम्वन्धी विभिन्न तथ्याङ्कसमेत सार्वजनिक गरिएको थियो । नुवाकोटमा साना ठुला गरेर १०९ वटा स्वास्थ्य संस्थाहरू रहेको छ । जस मध्य ५५ वटा स्वास्थ्य संस्थाहरूले प्रसुती सेवा दिदै आईरहेका छन् । ५५ बटा स्वास्थ्य संस्थाहरूबाट बार्षिक ५ हजार भन्दा बढी शिशुको जन्महुने गरेको स्वास्थ्य कार्यालय नुवाकोटले जनाएको छ ।

९ असार २०८०, शनिबार १८:०५



तपाईको प्रतिक्रिया