मतदान स्थलको निरिक्षण

अघिल्लो स्थानीय निर्वाचनमा ९९.९९ प्रतिशत मत खसेको म्यागङ–६ को बैजयन्ती शिक्षा निकेट आ.वि. मैवल मतदान केन्द्रमा निरक्षण टोली । तस्बिर : जगदीश खनाल

विदुर । बैशाख ३० को निर्वाचनका लागी नुवाकोटमा मतदान स्थलको निरिक्षण तथा अनुगमन सुरु भएको छ ।

बुधबार सुरक्षा निकायका प्रमुखहरूले स्थलगत रुपमै विदुर नगरपालिकाको तीन र म्यागङ गाँउपालिकाको ८ वटै मतदान स्थलको निरिक्षण तथा अनुगमन गरेका छन् । मतदान स्थलको अबस्था, निर्वाचनका सामग्रीहरू पु-याउनको लागी सडकको अबस्था र निर्वाचन पछि मुख्य निर्वाचन अधिकृतको कार्यालयसम्म सुरक्षित तरिकाले मतपेटिका ल्याई मतगणना सम्पन्न गर्ने उद्देश्यले मतदान स्थलको निरिक्षण तथा अनुगमन गरिएको गरिएको प्रमुख जिल्ला अधिकारी नारायणप्रसाद रिसालले जानकारी दिएका छन् ।

उनका अनुसार जिल्लाको १२ वटै स्थानीय तहको सबै मतदान स्थलको निरिक्षण तथा अनुगमन गरी अहिलेको वस्तुस्थितिको बारेमा जानकारी लिई मतदानको लागी मतदान स्थल तयारी अबस्थामा राख्नको लागी अनुगमन तथा निरीक्षण भएको हो । आवश्यकता, भौगोलिक विकटता, सडक सञ्जालको अबस्था र यसअघि भएका निर्वाचनको आधारमा नेपाल प्रहरी, शसस्त्र प्रहरी र नेपाली सेनाको टोलीले सुरक्षा योजना बनाईने प्रमुख जिल्ला अधिकारी रिसालले बताए । मतदान स्थलको निरिक्षण तथा अनुगमनमा प्रमुख जिल्ला अधिकारीको नेतृत्वमा जिल्ला प्रहरी कार्यालयका प्रमुख एसपी रामप्रकाश शाह, शसस्त्र प्रहरी प्रमुख मदन ढुङ्गाना, अनुसन्धानका प्रमुख हेमन्त चौधरी, जवरजंग गणका मेजर अञ्जय प्याकुरेल थिए ।

सो क्रममा टोलीले प्रहरी चौकीहरूको निरीक्षण समेत गरेको छ । सामरी प्रहरी चौकी, किम्ताङ प्रहरी चौकी र देउराली प्रहरी चौकीको निरिक्षण भएको हो ।नुवाकोटमा १३२ मतदान स्थल र २८७ वटा मतदान केन्द्र छ । यसअघिको निर्वाचनमा भन्दा यो पाली ३ वटा मतदान स्थल थपिएको छ भने २ वटा मतदान केन्द्र घटेको छ ।

२९ चैत्र २०७८, मंगलवार १०:०२



तपाईको प्रतिक्रिया