निर्माण सकिएको डेढ वर्षपछि हस्तान्तरण

विदुर । निर्माण सकिएको डेढ वर्षपछि जिल्ला समन्वय समितिलाई सभाहल हस्तान्तरण भएको छ ।

दुई साता अघि भएको जिल्ला समन्वय समिति नुवाकोटको छैटौं जिल्लासभामा नेकपा माओवादीका केन्द्रीय सदस्य एवं संघीय सांसद हितबहादुर तामाङको उपस्थितिमा जिल्ला समन्वय समिति प्रमुख रजिन्द्रविक्रमसिंह ठकुरीलाई सघन सहरी तथा भवन निर्माण आयोजना कार्यालय प्रमुख सुनिलकुमार ठाकुरले सभाहल सम्पन्न भएको प्रमाणपत्र बुझाएका हुन् ।

पञ्चायतकालमा बनेको उक्त सभाहल २०७२ वैशाख १२ गतेको भूकम्पले क्षति पुगेपछि नयाँ निर्माण गरिएको हो । सभाहलभित्र ३५८ सिट छन् । भवनमा एउटा ठूलो र अर्को सानो हल छन । सभाहलमा साना २६ वटा गाडीको लागि अन्डरग्राउन्ड पार्किङ छ । सभाहलको बाहिरपट्टि गार्ड हाउस, स्टोर रुम, क्यान्जिन, गेष्ट रुम, फायर फाइटिङ रुम, पम्प हाउस छन् । ठूलो हलको भुइँमा राखिएका सिट एकनासले राखिएकोले मञ्चमा कार्यक्रम हुँदा अगाडि सिटमा बसेकाले छेकिने छ ।

सभाहलको बाहिर घेरावाल पर्खालको पूर्वीभागमा तारले घेर्न बाँकी छ । हलको साउन्डसिस्टम भए पनि त्यसलाई सञ्चालन गर्न तालिम प्राप्त टेक्निसियन चाहिन्छ । यसअघि हल हस्तान्तरण नहुँदै सञ्चालनमा ल्याइएकाले बिजुलीको महशुल धेरै उठेको छ । बिजुलीको बिलको भुक्तानी कसले गर्ने भन्नेमा अन्योल भएपछि जिससले हल जिम्मा लिन मानेको थिएन ।

उक्त भवन लुम्बिनी/कोशी एन्ड न्यौपाने/बन्दनभगवती बत्तिपुतली काठमाडौं जेभीले भवन निर्माण गरेको हो । भवन २०७४ असार २० गते निर्माण ठेक्का भई कोरोनाका कारण म्याद थपपछि २०७८ साउन १९ गते सभाहल सघन सहरी तथा भवन निर्माण आयोजनाको कार्यालयलाई बुझाएको थियो । आयोजनाले सभाहल जिसस नुवाकोटलाई यही चैत तस्रो साता बुझाएको हो । यसको लागत २४ करोड ९५ लाख १३३ रुपैयाँ (भ्याटसहित)मा भए पनि ठेकेदारले २३ करोड ९५ लाख ६ हजार ६३८ रुपैयाँ ठेक्का सम्झौता गरी निर्माण सम्पन्न गरेको आयोजनाले जनाएको छ ।

सभाहल कार्यविधि बनाएर संचालनमा ल्याइने जिसस प्रमुख रजिन्द्रविक्रमसिंह ठकुरीले बताए । सभाहलको करिब ६ रोपनी जग्गा जिल्ला प्रशासन कार्यालय नुवाकोटको नाममा रहेको छ ।

१८ बैशाख २०८०, सोमबार १४:२१



तपाईको प्रतिक्रिया