ककनी । नुवाकोट जिल्लाको पुरानो मार्गको रुपमा रहेको पासाङल्हामु राजमार्ग अन्र्तरगत रानीपौवादेखि पिपलटार सडक खण्डका लागि सडक डिपीआरको काम सुरु भएको छ ।
सडक विभाग उक्त सडक आयोजनाले डिपीआरको काम अघि बढाएको छ । डिपीआर सकिए लगत्तै रकम सुनिश्चित गरेर ठेक्का प्रक्रिया सुरु गरिने जनाएको छ । अर्थमन्त्री डा. प्रकाशशरण महतले उक्त सडकका लागि बजेटको सुनिश्चितता गर्ने प्रतिवद्धतासहित डिपीआरको काम अघि बढाउन दिएको निर्देशन अनुसार उक्त काम सुरु भएको बताइएको छ । उक्त आयोजनाका प्रमुख मेघराज मरासैनीका अनुसार करिब डेड महिनासम्मका सडकको डीपीआरको काम सम्पन्न हुनेछ । रानीपौवाबाट पीपलटार ३४ किमि छ । यही सडकअन्तर्गत मुड्खु–तीनपिप्ले खण्डको करिब साढे ४ किमि सडक बनिसकेको छ ।
रानीपौवा–पीपलटार सडकमा भने डेढ महिनापछि स्रोत सहमतिका लागि अर्थ र राष्ट्रिय योजना आयोग पठाइनेछ । दुवै खण्डको ठेक्का चालु आर्थिक वर्षमै गर्ने गरी तयारी गरिरहेकोे उनले जानकारी दिए । रानीपौवा–पीपलटार खण्डसम्म भारतीय एक्जिम बैंकको ऋण सहयोगमा काम गरिँदै छ । त्यसका लागि विस्तृत परियोजना रिपोर्ट डीपीआर गरेपछि ठेक्का लगाइनेछ । यहाँ २ अर्ब रुपैयाँ लाग्ने अनुमान रहेको आयोजना प्रमुख मरासैनीले जानकारी दिए । रानीपौवा–पीपलटार भारतकै दिनेशचन्द्र आर अग्रवाल र नागार्ज‘न–कोसी एन्ड न्यौपाने जेभीले ठेक्का लिएका थिए । उक्त निर्माण कम्पनीसँग पनि २०७७ असार ९ मा ठेक्का सम्झौता तोडियो । अहिले कम्पनी कालोसूचीमा छ ।
२९ भाद्र २०८०, शुक्रबार १०:१४
