बट्टार । नुवाकोट क्रिकेट संघको नयाँ कार्यसमिति चयन भएको छ । जसमा उपाध्यक्ष र कोषाध्यक्ष पदका लागि निर्वाचन भयो भने अन्य पदहरूमा निर्विरोध निर्वाचित भएको छ ।
प्रमुख दुई पदमा पुरानै अनुहारसँगै संस्थापक अध्यक्षसहित नयाँ कार्य समिति निर्वाचित भएको छ । गएको आईतबार बट्टारमा भएको संघको चौथो अधिवेशनले अध्यक्षमा दुर्गाराज पाठकलाई पुनः अध्यक्षमा सर्वसम्मत चुनेको छ । पाठक नेपाल क्रिकेट संघ (क्यान) को केन्द्रीय कार्यबाहक सचिव हुन् ।
अधिवेशनमा उपाध्यक्ष र कोषाध्यक्षबाहेक सबै पदमा सर्वसम्मत भएको थियो । उपाध्यक्ष पदमा विष्णु प्याकुरेलले बिनोद श्रेष्ठलाई ७ मतान्तरले हराउँदै विजयी भएका हुन् । प्याकुरेलले १२ मत र श्रेष्ठले ५ मत प्राप्त गरेका छन् । सचिवमा करण खतिवडा सर्वसम्मत निर्वाचित भएका छन् ।
त्यस्तै, कोषाध्यक्ष पदमा राजेन्द्र पनेरुले विराटमानसिंह डंगोललाई ८ मतान्तरले हराउँदै विजयी भएका हुन् । पनेरुले १२ मत र डंगोलले ४ मत प्राप्त गरेका छन् । यस्तै, सदस्यहरूमा केशव मिश्र, अनुजमान श्रेष्ठ, रामधन ढकाल, प्रज्जवल सापकोटा, पारस अधिकारी, सुरज सिलवाल, उपेन्द्र भट्टराई र ओमप्रकाश श्रेष्ठ सर्वसम्मत निर्वाचित भएका छन् ।
३ भाद्र २०८०, आईतवार १७:२६
