बेलकोगढी । विकाससंगै आउने अन्य असरहरू पनि देखिन्छन् भन्ने उदाहरण यस नगरपालिमा भेटिएको छ । निञ्जना–बाघखोर सडक निर्माणपछि बेलकोटगढी नगरपालिका–८ जिलिङस्थित बागेश्वरी आधारभुत विद्यालयमा विद्यार्थी पातलिएको छ ।
निजी तथा अन्य विद्यालयमा विद्यार्थी भरिभराउ भईरहँदा उक्त विद्यालयमा विद्यार्थी संख्या पातलिएको छ । सडकको स्तरोन्नतीपछि अभिभावकहरू शहरिया जीवनशैलीले बसाईसराई गएका र घर आँगनमै निजी विद्यालयको साधन आउने भएपछि आफ्ना बालबालिकालाई विदुर नगरपालिकाका विभिन्न क्षेत्रका विद्यालयमा आफ्ना बालबालिका पठाउने गरेकोले विद्यार्थीको संख्या घटेको विद्यालयका प्रधानाध्यापक कृष्णप्रसाद पुडासैनीले बताएका छन् ।
विद्यालयमा करिब १५० को हाराहारीमा विद्यार्थी अध्ययन गर्ने गरेकोमा अहिले ३० भन्दा कम विद्यार्थी रहेका छन् । विद्यालयको कक्षा ३ र ४ मा अंग्रेजी माध्यमबाट अध्यापन हुने भएतापनि गाउँको शिक्षा भन्दा शहरमा रहेको विद्यालयको शिक्षा राम्रो हुने मनसायले विद्यार्थी लग्ने गरेको प्रअ पुडासैनीले बताए ।
अभिभावक र व्यवस्थापन भेलामा विद्यालयको शैक्षिक सुधारका प्रस्ताव बारम्बार राख्दा पनि कुनै कार्यन्वयन नभएको उनले बताएका छन् । विद्यालयमा ३० वर्ष स्थायी दरबन्दीको रुपमा अध्यापन गराउँदै आईरहेकोमा आगामी पुष महिनामा अनिवार्य अवकाश हुदैं गर्दा विद्यालयमा विद्यार्थीको संख्या कमी भएकोमा उनी दुःखी भएका छन् । बालशिक्षा र दिवा खाजा कार्यक्रम विद्यालयमा लागु भएतापनि विद्यार्थीहरू विद्यालय आउन छाडेका छन् । हाल विद्यालयमा दरबन्दी शिक्षक ३ जना, बाल शिक्षिका १ जना, नगरपालिकाबाट शिक्षक १ र कर्मचारी १ जना रहेका छन् ।
२४ श्रावण २०७९, मंगलवार २१:५४
