काठमाडौँ । कोभिड- १९ संकट व्यवस्थापन समन्वय केन्द्र (सीसीएमसी)ले सार्वजनिक स्थलमा २५ जनाभन्दा बढी भेला हुने कार्यक्रममा रोक लगाउन गृह प्रशासनलाई सिफारिस गरेको छ । सीसीएमसीले आइतबार विज्ञप्ति जारी गर्दै कोरोना संक्रमण तीव्र रूपमा फैलिरहेको भन्दै त्यसको रोकथाम, नियन्त्रण र उपचारलाई प्रभावकारी बनाउन विभिन्न निकायलाई सिफारिस गरेको हो ।
कोरोना संक्रमण रोकथामका लागि सीसीएमसीले १३ बुँदामा विभिन्न निकायलाई गरेको सिफारिसमा सार्वजनिक स्थलमा कुनै पनि प्रकारका भेला नगर्न आह्वान गरेको छ ।
‘सार्वजनिक स्थलमा सबै प्रकारका राजनीतिक या धेरै जना उपस्थित हुने गरी प्रशासनिक, सामाजिक एवं त्यहीँ प्रकृतिका कार्यक्रम नगर्न आह्वान नगर्ने,’ सीसीएमसीको सिफारिसमा भनिएको छ, ‘नगरी नहुने नियमित कार्यक्रमको हकमा स्थानीय प्रशासनको अनुमति लिएर गर्ने व्यवस्था मिलाउने । अर्को सूचना नभएसम्म सार्वजनिक स्थलहरूमा २५ जनाभन्दा बढी हुने गरी मेला, मेला तथा महोत्सवहरू आयोजना नगर्न/नगराउन सबै स्थानीय प्रशासनलाई गृह मन्त्रालयमार्फत लेखी पठाउन सिफारिस गर्ने ।’
त्यस्तै, सार्वजनिक स्थानहरू कार्यालय, होटल, रेस्टुरेन्ट, सिनेमा हल, रंगशाला, हवाईयात्रा, पार्क आदिमा प्रदेश गर्दा अनिवार्य कोरोना विरुद्धको खोप लगाएको कार्ड वा कार्डको फोटो साथमा राख्न आह्वान गरिएको छ । उक्त कार्य हेरेरमात्र सार्वजनिक स्थलहरूमा प्रवेशको व्यवस्था गर्न सम्बन्धित निकायलाई सिफारिस गरिएको छ ।
माघ १५ सम्म विद्यालय बन्द गर्न सिफारिस
कोरोना भाइरसको संक्रमण फेरि फैलिन थालेपछि कोभिड-१९ संकट व्यवस्थापन समन्वय केन्द्र (सीसीएमसी)ले देशभरका विद्यालयहरू माघ १५ गतेसम्म बन्द गर्न सरकारलाई सिफारिस गरेको छ । आइतबार बसेको सीसीएमसी व्यवस्थापन समितिको बैठकले १८ वर्षमुनिका बालबालिकालाई लक्षित गर्दै हिउँदे बिदाको रुपमा विद्यालय बन्द गर्न शिक्षा मन्त्रालयसमक्ष सिफारिस गरेको हो ।
देशभरका विद्यार्थीहरूले पूर्ण रुपमा खोप नलगाएको र संक्रमण बढ्दै गएकोमा रोकथामका लागि उक्त सिफारिस गरिएको सीसीएमसी प्रवक्ता सुनिता नेपालले जानकारी दिइन् ।
‘स्कुलका बालबालिकाहरूले पूर्ण मात्रा खोप नलगाइसकेको अवस्था र कोरोना संक्रमण पनि फैलिन थालेकोले यसलाई रोक्न व्यवस्थापन समितिको बैठकले स्कुलहरू बिदा गराउन सरकारलाई आग्रह गरेको हो,’ प्रवक्ता नेपालले भनिन् ।
२५ पुष २०७८, आईतवार २०:३८
