विदुर । नुवाकोटको प्रमुख जिल्ला अधिकारी र सहायक प्रमुख जिल्ला अधिकारीको सरुवा भएको छ । शुक्रवार गृह मन्त्रालयले प्रमुख जिल्ला अधिकारी र सहायक प्रमुख जिल्ला अधिकारीको काज सरुवा गरेको भएपनि आउने आइतवार/सोमवार तिर मात्रै नयाँ प्रजिअ र सहायक प्रजिअ नुवाकोट आउने बुझिएको छ ।
नुवाकोटमा प्रमुख जिल्ला अधिकारीका रुपमा कैलालीमा प्रमुख जिल्ला अधिकारी किरण थापा आउने भएका छन् । उनी कैलालीमा २०७८ साल असोज ३१ गते प्रजिअका रुपमा सरुवा भएका थिए । उनी त्यस अघि सुदुरपश्चिम प्रदेश मुख्य मन्त्री कार्यालयका सचिवका रुपमा कार्यरत थिए । २७ वर्षदेखि सरकारी सेवामा रहेको प्रजिअ थापा कानूनका विद्यार्थी हुन् ।
त्यस्तै डोल्पाका प्रमुख जिल्ला अधिकारी बेदनिधि अधिकारी नुवाकोटको सहायक प्रमुख जिल्ला अधिकारीका रुपमा काज सरुवामा आउदै छन् । उनी २०७८ साल असोज ३१ गते कारागार व्यवस्थापन विभागको निर्देशकबाट डोल्पामा प्रमुख जिल्ला अधिकारीका रुपमा सरुवा भएका थिए ।
नुवाकोटका प्रमुख जिल्ला अधिकारी नारायणप्रसाद रिसाल गृह मन्त्रालयमा र नुवाकोटका सहायक प्रमुख जिल्ला अधिकारी बेदप्रसाद अर्याल प्युठान जिल्लाको प्रमुख जिल्ला अधिकारीको रुपमा काज सरुवा भएका छन् । नुवाकोटमा कार्यरत प्रजिअ रिसाल १ वर्ष अघि नुवाकोट आएका थिए । त्यस्तै, सहायक प्रजिअ दुई वर्ष अघि नुवाकोट आएका थिए । तीनै तहको दुई वटा निर्वाचनलाई सम्पन्न गराएको र एक वर्षमा गृह मन्त्रालय अन्र्तगतका कर्मचारीहरुको सरुवा हुने कार्यविधिका कारण उनीहरुको सरुवा भएको हो ।
१० माघ २०७९, मंगलवार १७:१६
